Четворица обвинети за грабежот во „Тутунска банка” признаа вина пред судот

Скопје, 19 Октомври 2017

На денешното рочиште во Основниот суд Скопје 1 Скопје во врска со грабежот во Тутунска банка, четворицата обвинети опфатени со Обвинителен акт признаа вина за кривичните дела што им се ставаа на товар.

Имено, тие се изјаснија за виновни дека со умисла и во повеќе временски поврзани дејствија, искористувајќи ја својата работна позиција и познавање на процесите на работата во банката, противправно присвоиле парични средства во значителен износ од 400.000 швајцарски франци и 375.000 евра. На 10.04 2017 извршиле кражба и на 2.000.000 швајцарски франци и 270.000 евра. Иако ги признале во целост наводите од Обвинителниот акт, обвинетите не откриле што сториле со украдените парични средства.

Согласно Обвинителниот акт, првообвинетиот се гонеше за сторени кривични дела – Затајување од член 239 став 5 во врска со став 3 и 1 и во врска со член 45, што значи дека делото е сторено повеќе пати во низа како повеќекратно остварување на истото дело, како и за сторено кривично дело – Тешка кражба од член 236 став 3 од Кривичниот законик. Второто лице се товареше за истите кривични дела – Затајување и Тешка кражба, но во врска со член 24 од Кривичниот законик, односно за помагање. Третиот обвинет со Обвинителниот акт се товари за кривичното дело – Тешка кражба со помагање, додека пак четвртото лице е обвинето за кривичното дело – Затајување во врска со член 22 од Кривичниот законик, односно за соизвршителство.

Откако обвинетите ја признаа вината, судијата закажа рочиште на 27.10.2017 година, на кое ќе бидат изнесени завршните зборови во предметот против нив. За кривичното дело – Тешка кражба од член 236 став 3, што се однесува на предмети во вредност од големи размери, пропишана е затворска казна од 3 до 10 години. За кривичното дело од член 239 став 5 – Затајување, законикот пропишува затворска казна од една до 10 години.

Надлежниот обвинител кој постапува во предметот до судот достави и Обвинителен предлог против други четири лица, на кои како одговорни лица во банката врз основа на општ акт, со посебно овластување им биле доверени определен круг на работи, но тие несовесно постапиле во вршењето на своите овластувања и должности и со тоа го овозможиле противправното присвојување на паричните средства во горенаведениот износ. Две лица се товарат дека сториле кривично дело – Несовесно работење во службата од член 353 став 5 во врска со член 45 од Кривичниот законик, што предвидува вршење кривично дело од продолжен вид, додека другите двајца се товарат за истото кривично дело – Несовесно работење во службата, но за негово еднократно сторување.

Постапката против овие четири лица продолжува одвоено. ​

10 total views, no views today

Определен притвор за осомничените за нападот врз Зијадин Села

Скопје, 18 Октомври 2017

Основното јавно обвинителство Скопје донесе Наредба за проширување на истрагата за уште 3 лица за сторено кривично дело Убиство во обид сторено во соизвршителство, од чл.123 во врска со чл. 19 и во врска со чл.22 од Кривичниот законик. Осомничените беа вчера препознаени со помош на граѓаните по објавување на нивните фотографии.

Ценејќи дека се исполнети околностите предвидени во законот, надлежниот јавен обвинител до судија на предходна постапка во Основниот суд Скопје 1 Скопје достави Предлог за определување на мерка Притвор за осомничените лица.

Дополнување: Одлучувајќи по предлогот на надлежен јавен обвинител, судија на претходна постапка определи мерка притвор во траење од 30 дена за трите осомничени лица. Освен ова, притвор во траење од 30 дена беше определен и за петтото лице кое беше претходно лишено од слобода за истиот настан и за кое одлуката на Судот беше одложена заради влошена здравствена состојба на осомничениот.

20 total views, no views today

Определен притвор за четворица од приведените за нападот врз Зијадин Села

Скопје, 18 Октомври 2017

По предлог на надлежен јавен обвинител од Основното јавно обвинителство Скопје, судија на претходна постапка определи мерка Притвор во траење од 30 дена за четири лица кои се под истрага за сторено кривично дело Убиство во обид сторено во соизвршителство, од чл.123 во врска со чл. 19 и во врска со чл.22 од Кривичниот законик.

За петтото лице за кое обвинителството исто така предложи определување на мерка Притвор, поради влошена здравствена состојба судот дополнително ќе одлучи.

Постапката што се води против овие лица се однесува на настаните во Собранието на Република Македонија од 27 април и нападот врз Зијадин Села.​

23 total views, 1 views today

Утврден е идентитетот на лицата чии фотографии беа објавени

Скопје, 17 Октомври 2017

Јавното обвинителство на Република Македонија изразува благодарност до сите совесни граѓани со чија помош е утврден идентитетот на лицата чии фотографии беа објавени. По наредба на јавното обвинителство, трите лица се лишени од слобода.

Станува збор за лица кои се инволвирани во кривично правниот настан во Собранието на Република Македонија. Фотографиите и повикот до граѓаните за нивно препознавање беа објавени согласно член 277 од Законот за кривична постапка,  по претходно дадено одобрение од Основното јавно обвинителство Скопје и  во соработка со Министерството за внатрешни работи.

27 total views, 1 views today

Се трага по идентитетот на лица инволвирани во настаните во Собранието на Република Македонија

Скопје, 17 Октомври 2017

Заради утврдување на идентитет на лица инволвирани и битни во постапката за расветлување на настаните во Собранието на Република Македонија од 27 април, надлежен обвинител од Основното јавно обвинителство Скопје одобри јавна објава на нивните фотографии.

Фотографиите, во соработка со Министерството за внатрешни работи, се објавени на следниот линк:

http://www.moi.gov.mk/vest/5026

Се повикуваат сите граѓани, доколку ги препознаат лицата од објавените фотографии, да се јават во најблиската полициска станица или во Основното јавно обвинителство Скопје.

52 total views, no views today

Основното јавно обвинителство Скопје ја проширува истрагата за нападот врз Зијадин Села

Скопје, 17 Октомври 2017

Во врска со постапката што се води во Основното јавно обвинителство Скопје за настаните во Собранието на Република Македонија од 27 април и нападот врз Зијадин Села, надлежен јавен обвинител донесе Наредба за проширување на истрага за уште 5 лица за сторено кривично дело Убиство во обид сторено во соизвршителство, од чл.123 во врска со чл. 19 и во врска со чл.22 од Кривичниот законик.

Петте лица, по барање на надлежен јавен обвинител се лишени  од слобода при вршење на претрес во нивните домови. Во текот на денот Обвинителството ќе презема дејствија за утврдување на факти и спрема останати лица.​

70 total views, 1 views today

Во шест кривично-правни настани утврдено основано сомнение за сторени кривични дела поврзани со изборниот процес

Скопје, 16 Октомври 2017

22547851_10211808516862099_891768210_n

До завршување на изборниот ден, сумарно во Основните јавни обвинителства во Република Македонија се постапува во 6 (шест) кривично правни  настани, од кои еден во Основното јавно обвинителство Битола, два во Основното јавно обвинителство Кочани и три во Основното јавно обвинителство Скопје. Во нив обвинителството постапува поради утврдено постоење на основано сомнение дека се сторени кривични дела поврзани со изборниот процес. Во текот на овие предистражни постапки кои се водат во обвинителствата се преземаат дејствија за прибирање на вербални и материјални докази за комплетирање на предметите и донесување на јавно обвинителски одлуки за натамошно постапување. Делата за кои се водат постапките се однесуваат на Поткуп при избори и гласање од член 162 од Кривичниот законик, Злоупотреба на избирачко право од член 161 од КЗ и Изборна измама од член 165 од Кривичниот законик.

Основните јавни обвинителства во Република Македонија исто така постапуваат и за други 7 (седум) настани, за кои јавните обвинителства имаат добиено известувања од Министерството за внатрешни работи или пријави од граѓани и  други надлежни институции, а каде засега има само основи на сомнение дека има елементи на сторени кривични дела. Во овие предистражни постапки за настани кои се случиле на територија на Основните јавни обвинителства Битола, Охрид, Струга, Скопје и Кочани, јавните обвинителства преземаат дејствија за утврдување на факти, во насока на тоа дали воопшто има елементи на сторени кривични дела.  Постапките се за евентуално сторени кривични дела Повреда на слобода на определување на избирачите од  член 160 од Кривичниот законик, Поткуп при избори и гласање од член 162 од Кривичниот законик и  Противзаконито располагање со буџетски средства за време на избори и членот од член  165 в од Кривичниот законик.

“Во текот на изборниот ден, во Основните јавни обвинителства, како и во Комисијата за следење на изборни нерегуларности и преку електронската адреса izbori@jorm.gov.mk пристигнати се бројни известувања. Во голем дел од пристигнатите известувања не се утврдени елементи на сторени кривични дела за кои гонењето се презема по службена должности и кои се предвидени во Глава 16 од Кривичниот законик. За останатите известувања, јавните обвинители преземаат дејствија во предистражна постапка за да се утврди постоењето на кривичното дело и сторителот”, изјави претседателот на Привремената Комисија за следење на евентуални изборни нерегуларности, јавниот обвинител Џељаљ Бајрами.

За овие настани, како и за сите останати информации и известувања кои евентуално би пристигнале во Јавните обвинителства, надлежните јавни обвинители, како и Комисијата за следење на евентуални изборни нерегуларности , итно и со приоритет во работењето ќе ги преземат сите потребни дејствија за расветлување на настаните.

24 total views, no views today

СООПШТЕНИЕ

Скопје, 15 Октомври 2017

Комисијата за следење на евентуални изборни нерегуларности при Јавното обвинителство на Република Македонија ја известува јавноста дека будно ги следи сите случувања за време на изборниот процес и денеска за време на гласањето. Во сите јавни обвинителства во Република Македонија, покрај редовните дежурства, организирани се и дополнителни дежурства од јавни обвинители со цел приоритетно, итно да се постапува по предмети поврзани со изборниот процес.

До овој момент, во Основните јавни обвинителства има неколку пријави за изборни нерегуларности, за кои надлежните Основни јавни обвинителства преземаат дејствија во насока на утврдување на фактите за постоење на елементи на сторени кривични дела предвидени во  Глава 16 од Кривичниот законик – Кривични дела против изборите и гласањето.

Комисијата за следење на изборни нерегуларности продолжува да ја координира работата на јавните обвинителства во врска со откривање и гонење на сторители на кривични дела поврзани со изборите, за што во континуитет јавноста ќе биде известувана.

11 total views, 1 views today

Основното јавно обвинителство Охрид утврдува кривична одговорност за смртта на двегодишното дете од Охрид

Скопје, 10 Октомври 2017

Основното јавно обвинителство Охрид го доби Секциониот протокол од извршената судско медицинска експертиза на двегодишното дете кое почина во август годинава на детското одделение во Медицинскиот Центар Охрид. Патолошко хистолошката дијагноза и резултатите од токсилошките анализи укажуваат дека смртта кај детето настанала поради воспаление на двете белодробни крила, по што инфекцијата навлегувајќи во крвта предизвикала сепса.

Детето првпат беше примено на 25 август и по препишана терапија пуштено дома. Поради влошување на состојбата истото во два наврати било донесено во охридската болница, последниот пат без знаци на живот.

30 total views, no views today

Под истрага 24 лица за злоупотреба на Договори за закуп на земјоделско земјиште и исплата по Програмата за финансиска подршка во земјоделството​

Скопје, 05 Октомври 2017

Основното јавно обвинителство за гонење на организиран криминал и корупција во текот на денешниот ден спроведе координирана акција со МВР на РМ Оддел за сузбивање на организиран и сериозен криминал. Акцијата за сузбивање на кривични дела против службената должност и овластувања сторени на штета на Буџетот на Република Македонија е спроведена во повеќе населени места на подрачјето на Скопје, Тетово, Гевгелија и Валандово.

Надлежен јавен обвинител донесе Наредба за спроведување на истражна постапка против 24 лица поради постоење на основано сомнение дека сториле кривично дело Злоупотреба на службена положба и овластување по член 353 став 5 в.в. став 1 од Кривичниот законик. Со своето незаконско работење нанеле штета на Буџетот на Република Македонија во износ од околу 220.000 евра. Меѓу осомничените се 15 службени лица вработени во Министерството за земјоделство, шумарство и водостопанство и подрачните единици на ова министерство, а останатите осомничени се физички лица и одговорни лица во правни лица во приватна сопственост.

Основаното сомнение е дека во периодот од 2011 година до 2016 година осомничените службени лица ја искористиле својата службена положба или овластување и ги пречекориле границите на своите службени овластувања при склучување и раскинување на Договори за закуп на земјоделско земјиште. При преземањето на незаконитите дејствија биле помогнати од останатите осомничени лица. Во исто време, одобрувале исплата по Програмата за финансиска подршка во земјоделството – субвенции, на кој начин прибавиле корист за повеќе правни и физички лица на штета на Буџетот на Република Македонија.

Надлежниот јавен обвинител до Судијата за претходна постапка при Основниот суд Скопје 1 Скопје поднесе Предлог за определување на мерка притвор против седум осомничени лица.

За понатамошниот тек на истрагата, јавноста ќе биде навремено информирана.

61 total views, no views today

Page 1 of 4912345...102030...Last »