Едно лице осомничено за убиство во Велес

Скопје, 16 Август 2017

Дежурен јавен обвинител од Основното јавно обвинителство – Велес изврши увид на лице место во семејна куќа, во која што утрово околу 02:00 часот е извршено кривично дело убиство.

Настанот се случил кога 46-годишниот С.В. со тврд предмет, најверојатно чекан, ја скршил влезната врата на неговите соседи, влегол во собата каде спиела ќерката и ја удрил со чекан по глава при што ја повредил.

Во тој момент во собата влегле родителите на девојката, па осомничениот и нив ги удрил со чеканот по главата, нанесувајќи им тешки телесни повреди, од кои подоцна таткото починал.

По викотниците за помош, во собата дошле и братот на починатиот со сопругата, кои живееле на другиот кат од куќата, па осомничениот со чеканот и ним им нанел тешки телесни повреди.

По извршување на делото, осомничениот се вратил дома и на социјалните мрежи објавил статус во кој известува дека ги убил „своите монструми“. Веднаш е приведен и од страна на надлежен обвинител до Основен суд – Велес ќе биде доставен предлог за определување на мерка притвор против него.

Истовремено, јавниот обвинител издаде наредба да се изврши обдукција на телото на починатиот, како и наредба за подигање на сите траги и материјални докази од местото на настанот.

11 total views, 1 views today

Основното јавно обвинителство – Струга работи на расветлување на убиство

Скопје, 15 Август 2017

Дежурен јавен обвинител од Основното јавно обвинителство – Струга, заедно со увидна екипа од СВР Охрид – ПС Струга вчера изврши увид на лице место каде што беше убиен сопственик на ресторан.

Според првичните информации, убиството околу 17 часот го извршил непознат сторител со истрели од огнострелно оружје, на терасата на ресторанот „Аква блу“ во Струга.

Од лице место се подигнати траги и тие веднаш се дадени на вештачење, додека по наредба на јавниот обвинител, на телото на починатиот ќе се изврши обдукција. Интензивно се преземаат мерки и активности за откривање на сторителот на кривичното дело.

16 total views, 1 views today

Наредба за спроведување на истрага против полицаецот кој со истрел од службено оружје повреди двајца малолетници

Скопје, 14 Август 2017

Надлежен јавен обвинител од Основното јавно обвинителство – Струмица донесе Наредба за спроведување на истражна постапка против полицискиот службеник кој повреди двајца малолетници со истрел од службен пиштол. Полицаецот е осомничен дека сторил кривично дело – Убиство од член 123, а во врска со член 19 од Кривичниот законик.

За целосно расветлување на настанот, јавниот обвинител ги очекува резултатите од наредените вештачења на траги и материјални докази пронајдени на лице место, балистичките вешачења и анализите на трагите од барутни честички. Од сите инволвирани веднаш по инцидентот беа земени за анализа и примероци од крв и урина, како и парафински ракавици.

Со оглед на тоа што веќе се сослушани сведоците и се прибрани материјалните докази во постапката, за осомничениот се предложени серија мерки на претпазливост – забрана за напуштање на местото на живеење, обврска за редовно јавување во суд, привремено одземање на патната исправа и забрана за вршење на определени работни активности.

Во меѓувреме, состојбата на потешко повреденото момче се подобрува. Тој и натаму се наоѓа на скопските клиники, но е стабилен и свесен и во моментов не се наоѓа во животозагрозувачка состојба.

17 total views, no views today

Основното јавно обвинителство – Струмица врши увид на местото каде двајца малолетници беа повредени со службен полициски пиштол

Скопје, 12 Август 2017

Надлежен јавен обвинител од Основното јавно обвинителство – Струмица и денеска продолжува со увидот на колски пат, во близина на Градската капела кај Струмица, каде што синоќа полицаец со истрел од службено оружје повредил двајца малолетници.

Според првичните информации, до инцидентот дошло кога екипи од СВР Струмица се обиделе да го сопрат возилото во кое биле двајцата малолетници, а за кои претходно било пријавено дека се обиделе да извршат кражба на чамец во близина на браната Мантово. Малолетниците на два пати ја избегнале полициската патрола и не застанале, а потоа биле пресретнати од друго полициско возило на споредниот пат кај Градската капела. И натаму се работи на расветлување на начинот на кој дошло до пукањето од службениот полициски пиштол, при што биле повредени и двајцата малолетници.

Едното малолетно лице со посериозни повреди и прострелна рана во градниот кош уште синоќа беше префрлено на Клиниката за анестезија, реанимација и интензивно лекување во Скопје, додека над вториот малолетник е извршен оперативен зафат во болницата во Струмица и тој се наоѓа во добра општа состојба.

По наредба на надлежниот јавен обвинител, а заради обезбедување на непристрасност во постапката, во увидот се вклучени екипи од Одделот за криминалистичко-технички испитувања и вештачења при Министерството за внатрешни работи од Скопје. Притоа се издадени наредби за анализа на биолошки траги, балистичко вештачење, како и вештачење на папиларните линии подигнати на лице место. Од сите инволвирани земени се примероци од крв и урина и парафински ракавици. Полицаецот од чие оружје било пукано е задржан во ПС Струмица. Во текот на денот, во Основното јавно обвинителство – Струмица на записник ќе бидат сослушани сведоци на настанот.

Постапката за целосно расветлување на настанот продолжува.

24 total views, no views today

Основното јавно обвинителство – Скопје постигна спогодби со пет лица за нелегално препродавање билети

Скопје, 09 Август 2017

Основното јавно обвинителство – Скопје постапуваше по поднесени три кривични пријави од Министерството за внатрешни работи против пет лица осомничени за сторено кривично дело – Недозволена трговија од чл.277 ст.2 од Кривичниот законик.

Лицата беа осомничени дека го извршиле делото санкционирано со последните измени на Кривичниот законик, а со кои се санкционира нелегално препродавање билети за спортски натпревари. Согласно законот, за ова кривично дело е предвидена парична казна или казна затвор до една година.

Еден од осомничените е државјанин на Република Србија, двајца државјани на Велика Британија, додека двајца имаат двојно државјанство (и на Република Македонија и на САД). Со сите нив надлежните обвинители постигнаа спогодби за одмерување на видот и висината на кривичната санкција, со кои секое од лицата прифати да плати парична казна во висина од 500 евра. Дополнително, за лицата кои немаат македонско државјанство е предвидена и мерка протерување од земјата за време од една година.

Предлог-спогодбите со осомничените се доставени до судија на претходна постапка.

24 total views, no views today

Основното јавно обвинителство – Скопје поднесе обвинение за тешко разбојништво во менувачница во Драчево

Скопје, 03 Август 2017

Основното јавно обвинителство – Скопје поднесе Обвинителен акт против лицето И.И. за сторено кривично дело – Разбојништво од чл. 237 ст.5 во врска со ст.4 и ст.1, како и во врска со чл.22 од Кривичниот законик. Обвинителниот акт содржи и предлог за продолжување на мерката притвор за обвинетиот.

Настанот за кој се товари лицето се случил на 25.02.2013 година пред менувачницата „Золид Трејд“ во населбата Драчево – Скопје. Имено, според обвинението, обвинетиот И.И. заедно со лицето С.С., со употреба на огнено оружје одзеле туѓи подвижни предмети (пари во сопственост на менувачницата) и со умисла го лишиле од живот сега починатиот З.С.

За истиот настан, за С.С. веќе е изречена првостепена пресуда со која тој е осуден на казна затвор во траење од 20 години. Предметот е во жалбена постапка пред Апелациониот суд во Скопје. Сега обвинетиот И.И. извесно време беше недостапен на органите на прогонот.

24 total views, no views today

Поднесен обвинителен акт за едно лице за насилство во Собранието на Република Македонија

Скопје, 03 Август 2017

Основното јавно обвинителство – Скопје, во врска со настаните во Собранието на Република Македонија на 27.04.2017 година, спроведе истражна постапка против едно лице за сторено кривично дело – Насилство од чл.386 ст.6, а во врска со ставовите 3 и 1 од Кривичниот законик.

За ова кривично дело, согласно ставот 6, предвидена е казна затвор во траење од 3 до 10 години.

По завршената истражна постапка, до Основниот суд Скопје 1 – Скопје е поднесен и Обвинителен акт против осомничениот.

Имено, лицето се товари дека за време на настаните во законодавниот дом извршило грубо насилство, повлекувајќи за коса пратеничка во македонското Собрание. Оштетената во настанот се здобила со тешка телесна повреда.

60 total views, no views today

Предметот „Чекан“ е завршен со правосилна судска пресуда

Скопје, 31 Јули 2017

Со правосилна пресуда од Апелациониот суд – Скопје и ефективни затворски казни завршен е предметот во јавноста познат како „Чекан“. Во предметот што го водеше Основното јавно обвинителство за гонење на организиран криминал и корупција им се изречени затворски казни на седум лица за сторени кривични дела Лихварство и Изнуда.

Од осудените лица е конфискуван имот од кој оштетените имаат право на надомест на штета.

Во предметот „Чекан“  беше опфатена криминална  група која дејствувала во континуитет почнувајќи од 2008 година, претежно на територијата на Општина Гостивар. Главниот мотив бил стекнување на противправна имотна корист со извршување на повеќе кривични дела. Обвинетите неовластено подолго време се занимавале со давање пари на заем на други лица со договор. Притоа, искористувајќи ја тешката состојба на лицата тие договарале за себе несразмерна имотна корист. За враќање на заемот вршеле притисок, користејќи сериозни закани и физички напади врз оштетените.

31 total views, no views today

Едно лице под истрага за полов напад врз шестгодишно девојче во Скопје

Скопје, 30 Јули 2017

Дежурен јавен обвинител од Основното јавно обвинителство – Скопје издаде Наредба за спроведување на истражна постапка против едно лице, на возраст од 25 години, кое се сомничи дека сторило кривично дело – Полов напад врз малолетник кој не наполнил 14 години од член 188 ст.1 од Кривичниот законик.

Осомничениот се товари дека извршил други полови дејствија врз жртвата – девојче на возраст од шест години, со кое биле во подалечна роднинска врска. Имено, тој го искористил моментот кога во близина немало други лица, ја злоупотребил довербата на девојчето со кое живееле во различни куќи, но со исто дворно место и му побарал чаша вода. Кога девојчето отишло да му донесе, тој го следел во куќата и извршил други полови дејствија врз него.

Девојчето за инцидентот и кажало на својата мајка, која настанот го пријавила во полиција. Жртвата е видно потресена од целиот инцидент и со неа работат психолози за да биде во состојба да даде исказ за случувањето.

На барање на јавниот обвинител, судија на претходна постапка на осомничениот му определи мерка – Притвор во траење од 30 дена, оценувајќи дека постојат сите законски основи за тоа.

24 total views, no views today

Основното јавно обвинителство Куманово поведе постапка против лицето кое застрела гостин на свадба

Скопје, 27 Јули 2017

Осомничениот на ден 25 јули во 22.45 минути, додека присуствувал на свадбена веселба, извадил од појас пиштол марка Smith&Wesson и со умисла испукал еден куршум со кој го погодил сега починатиот Б.Х. , државјанин на Република Германија.

Основното јавно обвинителство Куманово донесе Наредба за спроведување на истражна постапка против осомничениот за сторени две кривични дела и тоа Убиство од член 123 став 1 и Неовластено  изработување, држење, посредување и тргување со оружје или распрскувачи материи од член 396 став 1 од Кривичниот законик.

Надлежниот јавен обвинител ценеше дека се исполнети законските основи, па до Основниот суд Куманово достави предлог за определување на мерката притвор за осомничениот. Предлогот беше прифатен од страна на судот, кој со Решение на осомничениот му определи притвор во времетраење од триесет дена.

33 total views, 1 views today

Page 1 of 4612345...102030...Last »